Pas 18 muajsh bombardimesh, asnjë universitet nuk ka mbetur më në Gaza. Shumë studentë dhe mësues janë vrarë ose plagosur. Megjithatë, ekziston një vullnet i fuqishëm për të vazhduar studimet aq sa të jetë e mundur.
Universiteti i Göteborg-ut po ndihmon në rindërtimin e programeve mësimore. Projekti është ende në fazën fillestare dhe mësimi nuk ka nisur ende. Ai do të realizohet kryesisht në bashkëpunim me Universitetin Birzeit, që ndodhet në Bregun Perëndimor dhe tashmë po ofron mësim online për studentët në Gaza.
Gjithçka nisi kur drejtuesit e Universitetit të Göteborg-ut shpërndanë informacion për stafin akademik dhe ata që ishin të interesuar për të marrë pjesë u ftuan të regjistronin interesin e tyre. Ata u pyetën për fushat lëndore që mund të ligjëronin dhe format e mësimdhënies që mund të ofronin. Më pas, një grup i vogël pedagogësh u caktua nga rektorja Malin Broberg për të koordinuar punën.
“Nuk kemi përcaktuar ende saktësisht se si do të funksionojë kjo, por po shqyrtojmë mundësitë për mentorim dhe ligjërata të ftuara,” thotë Karolina Catoni, koordinatore e seksionit suedez të organizatës Scholars at Risk në Universitetin e Göteborg-ut.
“Ajo që dimë me siguri është se bashkëpunimi nuk do të thotë që studentët nga Gaza do të pranohen në Universitetin e Göteborg-ut, por puna jonë do të përshtatet sipas nevojave konkrete në terren.”
“Për shembull, kemi vendosur që mësimi të mos zhvillohet në orët e mbrëmjes, pasi atje përdorin panele diellore për të gjeneruar energji elektrike. Është e rëndësishme të dëgjojmë se çfarë u duhet universiteteve në Gaza dhe të mos vendosim vetë nga këtu se si do të veprojmë.”
Deri tani, farmacia është identifikuar si një fushë ku mund të organizohen ligjërata. Sipas Universitetit Birzeit, nevojat më të mëdha janë në arsimin shëndetësor dhe arkitekturë. Rreth 50 pedagogë tashmë kanë shprehur interes për të marrë pjesë, edhe pse mësimdhënia do të bëhet në kohën e tyre të lirë dhe pa kompensim financiar, pasi qeveria nuk ka dhënë udhëzime që institucionet e arsimit të lartë në Suedi të mbështesin studentët palestinezë.
Pedagogët e Universitetit të Göteborg-ut kanë rrjete kontakti me kolegë në gjithë Suedinë, dhe ekziston interes, por vetëm Universiteti Södertörn ka ndërmarrë hapa formale.
“E pamë që Universiteti i Göteborg-ut kishte nisur këtë iniciativë dhe kontaktuam menjëherë,” thotë Cecilia Sjöholm, këshilltare e rektorit për çështjet e ndërkombëtarizimit në Universitetin Södertörn. “Rektori është shumë i interesuar dhe dëshiron që unë ta koordinoj këtë nga ana jonë.”
Ata kanë zhvilluar një takim me grupin në Göteborg që po koordinon projektin, të cilët bënë një prezantim. Tani po presin përgjigje nga Palestina përmes Universitetit të Göteborg-ut.
“Për momentin nuk jemi në kontakt të drejtpërdrejtë, pasi nuk duam të ngarkojmë universitetin në Palestinë që po punon për të ngritur sistemin në Gaza. Gjëja e rëndësishme është që ata të dinë se ne jemi të gatshëm të ndihmojmë nëse kanë nevojë. Më pas do të shohim nëse nevojat e tyre përputhen me atë që ne mund të ofrojmë,” thotë Sjöholm.
“Mendoj se gjëja më e rëndësishme është ndoshta t’u tregojmë universiteteve në Gaza se nuk janë vetëm. Vetëm të tregojmë solidaritet.”
Södertörn nuk ka dërguar ende kërkesa për pjesëmarrje tek pedagogët e saj, por Cecilia Sjöholm është e bindur se do të ketë njerëz të gatshëm për t’u përfshirë.
“Kur kemi folur për këtë, të gjithë mendojnë se është një ide shumë e mirë. Interesi ekziston.”
Gazeta Universitetsläraren ka kontaktuar një sërë institucionesh të tjera të arsimit të lartë, por asnjë prej tyre nuk ka plane për iniciativa të ngjashme në këtë fazë.
Kujtojmë se më 20 Maj, Universiteti i Prishtinës promovoi një antalogji me rrëfime për ngjarjet e 7 tetorit 2023 në Izrael, duke i dhënë zë vetëm njërës palë në luftën e Izraelit në Gaza.
Në Sallën e Senatit të Rektoratit të Universitetit të Prishtinës, u promovua antalogjia e redaktores Netta Gurevitch dhe ilustrues Danielle Peleg para disa studentëve dhe profesorëve të UP-së, në një ngjarje ku merrte pjesë edhe ambasadorja e Izraelit në Kosovë, Tamar Ziv.
