Një shekull pas ndarjes së imponuar të rajonit përmes marrëveshjeve si Sykes-Picot, SHBA shpall fundin e një epoke të gjatë ndërhyrjesh perëndimore në Lindjen e Mesme. Ambasadori amerikan në Ankara dhe i dërguari i posaçëm për Sirinë, Tom Barrack, në një deklaratë të fuqishme, tha se Perëndimi nuk do të përsërisë më gabimet historike që i kushtuan rajonit me dekada konflikte dhe padrejtësi.
“Një shekull më parë, Perëndimi imponoi harta, mandate dhe kufij të shkruar me laps për përfitime imperiale – jo për paqe. Ky gabim u kushtoi brezave të tërë. Ne nuk do ta bëjmë përsëri,” theksoi Barrack.
Ai shtoi se tragjedia siriane, e lindur nga përçarjet, mund të marrë fund vetëm përmes unitetit, dinjitetit dhe investimeve në vetë popullin sirian. “Rilindja e Sirisë duhet të vijë nga e vërteta, llogaridhënia dhe bashkëpunimi me rajonin, jo përreth tij,” tha ai.
Barrack u mbështet edhe në mesazhin e ish-presidentit amerikan Donald Trump në fjalimin e tij të 13 majit në Rijad, ku ai deklaroi: “Kanë ikur ditët kur ndërhyrësit perëndimorë fluturonin për në Lindjen e Mesme për të dhënë leksione se si të jetosh dhe si të qeverisësh punët e tua.”
Ambasadori amerikan theksoi se tani SHBA po qëndron përkrah Turqisë, vendeve të Gjirit dhe Evropës – jo më me trupa ushtarake apo kufij imagjinarë, por me partneritete reale dhe respekt për sovranitetin.
“Me rënien e regjimit të Asadit, dera është e hapur për paqen. Duke hequr sanksionet, po i mundësojmë popullit sirian që të hapë atë derë dhe të zbulojë një rrugë drejt sigurisë dhe prosperitetit të ripërtërirë,” përfundoi ai.
Kjo deklaratë vjen në një moment kyç për të ardhmen e Sirisë dhe të gjithë rajonit, duke sinjalizuar një qasje të re amerikane të bazuar në partneritet dhe jo imponim.
